Қазақстанда жыл сайын ондаған сот сарапшылары жұмыстан шығып жатыр
Сенат депутаты Нұрлан Бекназаров Қазақстандағы сот сараптамасы саласының проблемаларына назар аударды. Мәселен, өзекті мәселелердің бірі кадр тапшылығы болып табылады.
Нұрлан Бекназаров Премьер-министр Олжас Бектеновтің атына депутаттық сауал жолдап, онда сот сараптамасының қазақстандық жүйесінің проблемаларын шешу бойынша шаралар қабылдауға шақырды.
Сенатордың айтуынша, қазір бұл салада 140 жұмыс орны бос тұр, сондай-ақ жыл сайын ондаған сарапшылар жұмыстан шығарылады. Оның себебі – жалақының төмендігі, жұмыс кестесінің шамадан тыс жүктелуі, әлеуметтік кепілдіктердің болмауы және медициналық сарапшыларды оқыту ұзақтығы.
“Сарапшылар санының жеткіліксіздігі сараптамалық жүктеменің 3-4 есе ұлғаюына, сараптама жүргізу мерзімдерінің ұзақтығына алып келеді, бұл қылмыстық және азаматтық сот ісін жүргізуде азаматтардың құқықтарын қорғау және қамтамасыз ету кезінде іс жүргізу мерзімдеріне теріс әсер етеді. Ағымдағы жылдың 7 айында 62 сот сарапшысы өз еркімен жұмыстан босатылды “, – деді Нұрлан Бекназаров.
Депутат атап өткендей, тағы бір мәселе – Орталық филиалдарын ғимараттармен және үй-жайлармен жабдықтау. Оның айтуынша, адамдарға бейімделген үй-жайларда жұмыс істеуге тура келеді.
Сондай-ақ, сот сарапшыларының кәсіби деңгейін қолдау үшін 5 жылда бір рет біліктілігін арттырудан өтуі тиіс. Алайда, Қазақстанда біліктілікті арттыру бойынша ғылыми-әдістемелік база жоқ. Сот сарапшыларын шетелде оқытуды көздейтiн бюджеттiк бағдарлама жоқ.
Осыған байланысты, сенатор Нұрлан Бекназаров Үкіметтен елдегі сот сараптамаларының сапасы мен тиімділігін арттыруға бағытталған бірқатар шараларды қабылдауды өтінді.
“Сот сарапшыларының еңбегіне ақы төлеу жүйесін жетілдіру арқылы олардың әлеуметтік мәртебесін арттыру бойынша шұғыл шаралар қабылдау, халықаралық аккредиттеу стандарттарын енгізу талаптарын ескере отырып, қолда бар ғылыми-техникалық жабдықтарды жаңғыртуды және жаңа жабдықтарды сатып алуды қамтамасыз ету бойынша жүйелі шаралар қабылдау қажет. Ауылға жұмыс істеу үшін келген Орталықтың мамандарына әлеуметтік қолдау шараларын ұсыну. Өңірлерде Сот сараптамасы институттары үшін типтік ғимараттар салуға қаражат бөлу қажет “, – деді депутат.
